"Game of Thrones" буюу "Хаадын тоглоом" цувралын Тормундын дүрээр алдаршсан, Норвегийн жүжигчин Кристофер Хивью, “Галзуу хурд”, “Avengers: Infinity War” киноны Хеймдалын дүрээр танигдсан Английн алдарт жүжигчин, Оскарын шагналт Идрис Элба нар шинэ төрлийн коронавирусийн халдвар авсан нь батлагджээ.

Найруулагч Ники Каро, Disney компанийн бүтээл “Мулан” киноны нээлт коронавирусний халдварын улмаас Хятадад хойшлогдсоны дараа Япон, Өмнөд Солонгос улсад ч цуцлагдлаа. Японд дөрөвдүгээр сарын 17-нд болох байсан нээлтийг тавдугаар сарын 22 болгож, сунгасан байна. Харин Өмнөд Солонгост нээлтээ хэзээ хийх нь тодорхойгүй хэвээр.

Дэлхий даяар тархаад буй коронавирус БНСУ-д эрчимтэй тархаад байгаа билээ. Өнөөдөр өглөөний 09.00 цагийн байдлаар 334 хүн нэмж халдвар авсан болох нь тогтоогдож БНСУ-ын хэмжээнд халдвар авсан иргэдийн тоо нийтдээ 1595 болоод байна. Тус улсад амны хаалтын хомсдол бий болоод буй. Үүнээс үүдэн амны хаалт үйлдвэрлэж байгаа үйлдвэрүүд экспортоо зогсоож, зөвхөн дотоодын хэрэгцээгээ хангах шийдвэр гаргаад байгаа бөгөөд тус улсын урлаг, соёлын одод иргэддээ зориулан хандив өргөж эхлээд байна.

Өмнөд Солонгосын поп хамтлаг BTS удахгүй болох тоглолтуудыг нь үзэхгүй байж, өөрсдийгөө халдвараас сэргийлэхийг шүтэн бишрэгчдээсээ хүсчээ. Тус хамтлаг энэ долоо хоногт сүүлд хийсэн "Map of the soul: 7" цомгийн нээлтдээ зориулан Сөүлд хэд хэдэн телевизийн шоу тоглолт зохион байгуулах гэж байгаа билээ.

Өмнөд Солонгосын хөвгүүдийн “BTS” хамтлаг, найруулагч Бон Жүн Хугийн “Шимэгч” кино 2019 онд Солонгосын урлагийг дэлхий дахинаа таниулж, жинхэнэ Солонгос давалгааг үүсгэж тус улсын төдийгүй дэлхийн урлагийн салбарт нэгэн шинэ хуудсыг нээлээ.

Дэлхийн кино урлагийн тэргүүн наадам болох 92 дахь удаагийн Академийн шагнал гардуулах ёслол буюу Оскарын наадам Лос-Анжелес хотын Долби театрт сүр дуулиантайгаар болж өнгөрлөө. Энэ жилийн наадамд өмнөд Солонгосын "Parasite" киноны уран бүтээлчид "Оскар"-ын наадмаас хамгийн шилдэг буюу "Шилдэг кино" шагналыг хүртлээ. Ийнхүү тус кино "Академи Авардс"-аас дөрвөн шагнал хүртсэн Оскарын түүхэнд "Шилдэг кино"-гоор тодорсон анхны гадаад кино боллоо.

Флорида мужийн Майами-Гарденст “Hard Rock Stadium” цэнгэлдэхэд болсон америк хөлбөмбөгийн Супер Боул тэмцээний нээлт дэлхий даяар шуугиан тарилаа. Гол баатрууд супер одууд болох Шакира, Жэй Ло нар байлаа.

Их Британийн кино ба телевизийн академийн шагнал гардуулах ёслол буюу “BAFTA” кино наадам ням гаригт /2020.02.02/ Лондон хотноо зохион байгуулагдлаа. Тус кино наадмын гол шагнал болох шилдэг киноны шагналыг Америкийн найруулагч Сэм Мендесийн"1917″ кино хүртсэн байна. Энэхүү кино нь нийт есөн нэр төрөлд дэвшин, шилдэг зураач, дуу, зураг авалт, визуаль эффект зэрэг долоон нэр төрлөөр шагнал хүртжээ.

Gallup хэмээх олон нийтийн судалгааны байгууллагаас АНУ-ын иргэдийн дунд явуулсан санал асуулгын үр дүнд 2019 онд америкчууд номын санд кинотеатр, эсвэл спортын арга хэмжээнээс илүү очжээ. Тус байгууллагын мэдээллээс үзэхэд, номын санд зочлох нь америкчуудын хийдэг хамгийн түгээмэл соёлын нэг үйлдэл хэвээр байгаа бөгөөд Америкийн насанд хүрсэн хүмүүс 2019 онд номын санд дунджаар 10.5 удаа очжээ. Энэ нь хоёрдугаар байрт орсон кинотеатрт очдог үзүүлэлтээс бараг хоёр дахин их байна. Өнгөрсөн онд америкчууд дунджаар 5.3 удаа кинотеатрт очсон бол спортын арга хэмжээнд дунджаар 4.7 удаа очжээ.