2014-06-03 08:29

“Нарны жим” олон ангит уран сайхны кино нээлтээ хийлээ

Онцгой байдлын ерөнхий газар, Монголын үндэсний олон нийтийн телевизтэй хамтран хэрэгжүүлж буй төслийн хүрээнд бүтсэн “Нарны жим” олон ангит уран сайхны кино өчигдөр орой нээлтээ хийлээ.

Уг киног Монгол Улсын Шадар сайд Л.Тэрбишдагвын санаачилгаар гамшгаас хамгаалах төрийн бодлого, хууль тогтоомжийг сурталчлах, онцгой байдлын албаны үйл ажиллагаа, албан хаагчдын ажил, мэргэжлийн онцлогийг олон нийтэд таниулан ойлгуулах, иргэдэд гамшиг, ослоос урьдчилан сэргийлэх мэдлэг, боловсролыг олгох зорилгоор өнгөрсөн оны долоодугаар сарын дунд үеэс зураг авалтыг нь эхлүүлсэн.
 
Кино зураг авалтыг Улаанбаатар хот болон Сэлэнгэ, Дорнод, Хэнтий, Төв аймагт хийсэн бөгөөд Онцгой байдлын албаны албан хаагчдын болзошгүй осол, аюулт үзэгдлээс урьдчилан сэргийлэх, хамгаалах үйлсэд хүчин зүтгэж төр, ард түмнийхээ хүлээлгэсэн итгэл найдварыг нэр төртэй биелүүлж буй албан хаагчдын ажил мэргэжлийн онцлогийг олон нийтэд сурталчлан таниулахад чиглэгдсэн байна.
 
Мөн иргэдэд эх орноо хайрлан хамгаалах үзлийг төлөвшүүлэх, гамшиг, ослоос урьдчилан сэргийлэх мэдлэг, боловсролыг олгох, соён гэгээрүүлэхэд тус уран бүтээлийн зорилго оршиж байгаа юм. Уг кино нь Онцгой байдлын асуудал эрхэлсэн байгууллага нэгдсэн тогтолцоонд шилжсэний 10 жилийн ойн хүрээнд бүтээгдэж байгаагаараа ихээхэн онцлогтой юм.
 
Кино зохиолчоор М.Наранцогт, ерөнхий найруулагчаар Б.Гантулга, ерөнхий продюсераар Ц.Лхагвадаш нар ажиллаж дүрүүдэд МУГЖ Ш.Дэлгэржаргал, С.Дамдин,  А.Төгсбаяр, Т.Баттулга, Ш.Мөнхбаяр, О.Гантулга, Э.Урангоо, Ц.Нямжав, М.Батжаргал, Т.Мөнх-Эрдэнэ /реппер Gee/ нарын 100 гаруй жүжигчин оролцон тоглосон байна.
 
Зураг авалтын явцад нийслэл, аймаг орон нутгийн онцгой байдлын албад, ажилтанууд сайн дураараа хандив өргөж, сэтгэлийн дэм хайрлан, өөрсдийн өдөр тутмын амьдрал, нандин бас гунигт дурсамжуудыг хадгалж үлдсэн “Нарны жим”-ийг бүтээхэд хувь нэмрээ оруулсан гэдгийг кино бүтээгчдийн зүгээс онцлон дурдсан юм.
 
Одоогоор 3000 гаруй ажилтан албан хаагчтай ОБЕГ-ын зүгээс кино уран бүтээлийн явцад ихээхэн анхаарч, ерөнхий зөвлөхөөр ОБЕГ-ын бэлтгэл хурдандаа н.Дамдин, С.Цогтбаатар нар ажиллаж, болзошгүй ослын үеийн зураг авалтуудад биечлэн зааварчилгаа өгсөн байна.
 
“Нарны жим” олон ангит уран сайхны кино нь нийт 50 ангитай бөгөөд долоо хоног бүрийн даваа-баасан гарагт 22:00 цагт үзэгчдэд хүрэх юм. Нээлтийн ёслолд МҮОНРТ-ийн ерөнхий захирал М.Наранбаатар тэргүүтэй уран бүтээлчид, Онцгой байдлын ерөнхий газрын дарга Т.Дуламдорж, ажилтан албан хаагчид,  гол дүрийн жүжигчдийн төлөөлөл хүрэлцэн ирсэн. Нээлтийн ажиллагаа МҮОНТ-ийн "Студи-600"-аас  шууд дамжуулагдсан юм.
 
 
 
 
Ерөнхий найруулагч Б.Гантулга: Кинонд маань мэндлээд хоёрхон хонож байгаа хоёр ихэр хүүхэд тоглосон
 
- “Нарны жим” ОАУСК-ноос үзэгчид яг юу хүлээх ёстой бэ?
 
- Киноны маань гол зорилго бол гарч болзошгүй ослоос ард иргэд байнга бэлтгэлтэй байх, иргэний үүргээ хүлээн ажиллах сэжмээр дамжуулан Онцгой байдлын ажилтан, албан хаагчдын өдөр тутмын амьдрал, ар гэр, хайр сэтгэл хэрхэн өрнөж байдгийг харуулах явдал юм. Нийт 100 гаруй жүжигчний бүрэлдэхүүнтэй уг кинонд төрөөд хоёрхон хонож байгаа хоёр ихэр хүүхэд хүртэл тоглосон гэдгийг дуулгахад таатай байна.  
 
- Болзошгүй ослын үеийн зураг авалтууд нэлээдгүй хийгдсэн байх?
 
- Тийм ээ. Илүү хүнд нөхцөлүүдийг гаргахын тулд болзошгүй ослын үеийн зураг авалтууд нэлээд хийгдсэн. Тухайлбал, гал түймрийн үеийн зураг авалтад гэрэлтүүлэгч, зураглаач, дууны найруулагч, жүжигчинтэйгээ хамт улаан гал руу орж, зураг авсан. Түүнчлэн үерлэсэн их ус, Булган аймагт 40 хэмийн хүйтэнд зуд турханы үеийн зураг авалтууд гэхчлэн тоочоод байвал нэлээн хэд бий. Энэ бүхний цаана Онцгой байдлын албан хаагчдын амьдрал, ар гэр байдаг гэдгийг харуулахыг зорьсон байгаа.
 
Кино зохиолч М.Наранцогт: Богино хугацаанд аль болох их мэдээллийг цуглуулахыг хичээж ажилласан
 
- Кино зохиолчийн хувьд цөөхөн үгээр гол санааг нь ончлон хэлнэ үү?
 
- Энэхүү киногоор ард иргэдийг аливаад сонор сэрэмжтэй, болзошгүй ослын үед бие биедээ тустай, хүнлэг байх сэдлүүдийг нэлээд дэлгэрүүлэн гаргаж өгсөн. Ингэснээрээ гамшиг осолгүй айл өрх, иргэн, улс орон байх тэр л ойлголт, зөв мэдээллүүдийг хүргэхийг хичээсэн байгаа. Энэ бүхий л санаа киноноос маань харагдах байх аа гэж бодож байна.
 
- Кино зохиолыг бичихийн тулд багагүй судалгаа хийсэн гэж сонссон?
 
- Мэдээж маш сайн судлаж байж, Онцгой байдлынхны өдөр тутмын амьдралыг уран сайхны аргаар дүрслэн гаргах шаардлага үүссэн. Кино бүтэх явц нь өөрөө нь тодорхой цаг хугацаанд захирагддаг учраас богино хугацаанд аль болох их мэдээллийг цуглуулахыг хичээж ажилласан байгаа.
 
Т.Мөнх-Эрдэнэ: Онцгой байдлын Тамгын газрын даргын хүүхдийн дүрд тоглосон
 
- Реппер Gee олон ангит уран сайхны кинонд тоглосон гэхээр сонирхолтой санагдлаа?
 
- Онцгой байдлын Тамгын газрын даргын хүүхдийн дүрд тоглосон байгаа. Миний дүрийн онцлог нь үндсэрхэг үзэлтэй, реппер залуугийн дүрээ киноны гол дүр Гантигийн найз охиныг “чаргуулцалдах” байдлаар гардаг. Ерөнхийдөө бол аавынхаа ажлын онцлогийг мэддэг, аавынхаа зарим нэг зүйлд дуртай, зарим зүйлд нь дургүй, өөрийнхөөрөө дүрд тоглосон байгаа.
 
Кино зөвлөх, ОБЕГ-ын бэлтгэл хурандаа С.Цогтбаатар: Кино бүтэх бүхий л явц мэргэжлийн өндөр түвшинд өрнөсөн
 
- “Нарны жим” ОАУСК бүтэх явцад зөвлөхөөр ажилласан сэтгэгдлээсээ хуваалцана уу?
 
- Кино зураг авалт эхэлснээс хойших бүхий л хугацаанд миний бие Онцгой байдлын ерөнхий газрын бэлтгэл хурандаа н.Дамдины хамт зөвлөхөөр орж ажилласан. Зураг авалтуудад байнга хамт явж, Онцгой байдлын ажлын онцлогийг кино зураг авалтын явцад тохируулан уран сайхны аргаар илэрхийлэн гаргахад мэргэжлийн зөвлөгөө өгч ажилласан гэсэн үг л дээ. Тэр дундаа шүлхий гарсан бүс нутаг, ой хээрийн гал түймэр, үер усны үед онцгой байдлын албан хаагчид хэрхэн ажилладаг явцыг найруулагчтай зөвлөн дэлгэцнээ буулгах ажил дээр голчлон ажиллалаа. Кино бүтэх явц мэргэжлийн өндөр түвшинд өрнөж, одоо ингээд нээлтийг нь хүлээгээд зогсож байх үнэхээр сайхан байна. Энэ кино бол онцгой байдлын албан хаагчдын жаргал, зовлон, ажил мэргэжлийн онцлог талуудыг нээн харуулсан анхны олон ангит уран бүтээл гэдгээрээ ихээхэн онцлогтой юм.
 
 
 
Манай сайт таньд таалагдаж байвал мөн сайтад нийтлэгдсэн
мэдээ мэдээлэлийг түргэн шуурхай уншихыг хүсвэл "LIKE" дарнауу

Шинэ мэдээ
Тоглолтын мэдээ
  • “Өндөр гэгээн” дуулалт жүжгийг Орхонд тоглоно“Өндөр гэгээн” дуулалт жүжгийг Орхонд тоглоно Урлагийн гавьяат зүтгэлтэн Л.Ванганы нэрэмжит Завхан аймгийн хөгжимт жүжгийн театрын бүтээл “Өндөр гэгээн” дуулалт жүжгийг энэ сарын 14-ний өдөр Орхон аймгийн соёлын ордонд тоглохоор болжээ. Жүжгийг хоёр удаа тоглох юм байна. Завхан аймгийн Шилүүстэй сумын харьяат Төрийн соёрхолт яруу найрагч Ц.Бавуудоржийн зохиол, хөгжмийн зохиолч Урлагийн гавьяат зүтгэлтэн Т.Сэр-Од, Төрийн соёрхолт, Улсын Драмын эрдмийн театрын ерөнхий найруулагч Н.Наранбаатар нарын хамтран бүтээсэн “Өндөр гэгээн” дуулалт жүжгийг бүтээх үйл явж жил гаруй үргэлжилжээ. Жүжгийн нээлт өнгөрөгч гуравдугаар сард Завхан аймгийн театрт болж байв.
  • “Номоо солилцъё” өдөрлөг энэ сарын 4,5-д болно“Номоо солилцъё” өдөрлөг энэ сарын 4,5-д болноНийслэлийн иргэд цуглаж өөрт байгаа номоо сарын хугацаатай бусадтайгаа солилцож уншдаг болоод жил гаруй хугацаанд тасралтгүй үргэлжилж буй “Номоо солилцъё” өдөрлөг энэ сарын 04-ны өдөр 10:00-17:00 цагийн хооронд, 05-ны өдөр 10:00-14:00 цагийн хооронд хоёр өдрийн турш Улаанбаатар хотын нийтийн төв номын санд зохион байгуулагдах гэж байна. Энэ удаагийн өдөрлөг “ҮНДЭСНИЙ БИЧИГ ҮСГИЙН БАЯР”-ын өдрийн хүрээнд зохион байгуулагдаж байгаагаараа ихээхэн онцлогтой юм.
  • Playing Love Best тоглогдоноPlaying Love Best тоглогдоноХөгжмийн зохиолчдын авьяас билгээ сорих, ур чадвараа харуулах нэг шалгуур нь киноны хөгжим байдаг гэлцдэг. Кино урлаг үүсэж хөгжихтэй хамт бий болж, хөгжсөн хөгжмийн энэхүү томоохон урсгалын энэ үеийн гол төлөөлөгчдийн нэг нь Эннио Морриконе билээ. Түүний "1900-гийн домог" (Legend of 1900) кинонд зориулан бичсэн "Playing love" зохиолоор нэрлэгдсэн тоглолтоо Морин хуурын чуулга найм дахь жилдээ үзэгч, сонсогч олондоо өргөн барих гэж байна. Энэхүү тоглолт нь Монголын төдийгүй дэлхийн алдарт киноны сэтгэлд хоногшсон сонгомол хөгжим аялгууг үндэсний хөгжмийн хөг эгшгээр амилуулан хөгжимдөж, Морин хуур хэмээх гайхамшигт хөгжмийн зэмсгийн чадал, ур хийцийн гайхамшгийг тод томруун харуулдаг тул үзэгчид жил жилийн тоглолтыг тэсэн ядан хүлээдэг биз ээ.
  • Come Fly With Me тоглолт маш өвөрмөц боллооCome Fly With Me тоглолт маш өвөрмөц боллооӨнгөрсөн Бямба гараг буюу 4-р сарын 14-нд Корпорейт Конвеншн төвийн концертын их танхимд дуучин Наагийгийн тоглолт болж өнгөрлөө. Тэрээр анхны тоглолтоо 2012 оны энэ өдөр Strangers In The Night нэртэйгээр Тусгаар тогтнолын ордонд хийж байсан юм. Өнгөрсөн 6 жилийн хугацаанд дуучны дуулах ур чадвар, дуулалтын мэдрэмжүүд улам нэмэгдсэн байсан бөгөөд тоглолтын 90 минутын турш өөртөө итгэлтэйгээр үзэгчдэд олны танил Монгол болон гадаад дуунуудыг хүртээл болгож байлаа.
  •  Жүжигчин Г.Ундармаа насанд хүрэгчдэд зориулсан шинэ бүтээлээ удахгүй нээнэ Жүжигчин Г.Ундармаа насанд хүрэгчдэд зориулсан шинэ бүтээлээ удахгүй нээнэХошин урлагийн тайзнаасаа хөндийрч дэлгэцийн бүтээлдээ түлхүү анхаарлаа хандуулж буй жүжигчин Г.Ундармаа дахин нэг өөр төрлийн шинэ бүтээлээрээ тун удахгүй тэсрэлт хийхээр зэхэж байна.