2018-04-19 00:39

Хэнтийн авьяаслаг багачууд уран зургийн үзэсгэлэн гаргалаа

   Даяаршиж буй нийгэмд томчууд бид аливаа зүйлийн хар барааныг урьтаж хардаг болсон нь маргашгүй үнэн. Гагцхүү хорвоо ертөнцийн өнгийг улам тод, гэрэлтэй, яг л солонгын долоон өнгө адил болгож байдаг ховорхон зүйлүүдийн нэг бол хүүхдийн ертөнц бас тэдний бүтээлүүд билээ. “Хүүхдийн уран бүтээлд дэлхий багтдаг” хэмээн хүүхдийн номын зохиолчид нэгэнтээ хэлсэн байдаг. Энэ үгийг Хэнтий аймгийн хүүхэд багачуудын зурсан 100 гаруй зураг бататгах мэт. Шар нар, цэнхэр далай, ногоон зүлэг, бор байшин, ногоон бөмбөг, хөх онгоц, ягаан бамбарууш, улаан цэцэг гээд л өнгө өнгөөр алагласан 100 гаруй уран зургууд өөрийн эрхгүй нүд баясгана.

   Анзаарч харвал дөрөв, таван настай бяцхан Пикассонуудын зургийн гол сэдэв нь өвөө, эмээ, аав, ээж, ах, эгчтэйгээ аз жаргалтай амьдарч байгаагаар дүрсэлсэн байх. Мэдээж машин, онгоц, цагдаа ахыг зурсан зургууд ч харагдана. Дийлэнх нь хөвгүүдийн бүтээл ажээ. Харин цэцэг, туулай, өлгийтэй хүүхэд, ангаахайнуудаа дагуулсан дэгдээхэй зэрэг ан амьтан, ургамал моддын дүрслэлийг охидууд бүтээжээ. Зарим нь өөрсдийн шимтэн үздэг “Пороро”, “Миний бяцхан одой морь”, “Пеппа торой” зэрэг хүүхэлдэйн киноны үлгэрийн баатруудыг ч амилуулсан байна. Энэ бол Хэнтий аймгийн 4 дүгээр цэцэрлэг болон мөн аймгийн Өмнөдэлгэр сумын 14 дүгээр цэцэрлэгийн багачуудын Улаанбаатар хотын найзууддаа зориулан гаргасан “Уран бийр” үзэсгэлэнд дэлгэсэн бүтээлүүд байлаа.

   Хэнтий аймгийн дөрөвдүгээр цэцэрлэгийн багш Б.Занданхүү “Хүүхдийн ордонд болсон “Уран бийр” үзэсгэлэнд 190 хүүхэд, багш нарын 400 гаруй бүтээл тавигдлаа. Гэхдээ энэ үзэсгэлэн анхных нь биш. Манай цэцэрлэг улс болон аймгийн хэмжээнд тав дахь удаагаа хүүхдүүдийнхээ бүтээлийг танилцуулж байгаа. Энэ удаагийн үзэсгэлэнд багш нарын гараар хийсэн бүтээлүүдийг тавьснаараа онцлог боллоо. Манай багш нар сургалтын бааз, хичээлийн хэрэглэлээ өргөжүүлэхийн тулд гарын доорх материал ашиглан хүүхдийн танин мэдэхүй, сэтгэхүй, гарын эв дүйг хөгжүүлэх төрөл бүрийн хэрэглэгдэхүүн хийсэн. Мөн манай цэцэрлэгийн 40 гаруй хүүхэд Хүүхдийн ордны алтан медалиар шагнууллаа” хэмээн ярив.

   Шинэ жилийн баяр ойртоход эцэг, эхчүүд хүүхдэдээ багт наадмын баг авч өгөх эрэлд гардаг. Тэгвэл Хэнтийн багш нар хулгана, гахай, туулай, сармагчин, хонь гэхчилэн дийлэнх амьтны багийг өөрсдийн гараар урлажээ. Ингэхдээ арьсанд  нь харшил өгөхгүй материалаар хийсэн байсан нь эцэг,эхчүүдийн талархлыг хүлээжээ. Мөн “Алтан загасны үлгэр”,  “Царцаа шоргоолж хоёр” үлгэрийн баатруудыг ч гараар урласан харагдана.  Өмнөдэлгэр сумын 14 дүгээр цэцэрлэгийн эрхлэгч О.Ганцэцэг “Хүүхдүүдийн сонирхол, сэтгэхүй нийгмээ дагаад өөр болсон. Тиймээс багш нар бид хүүхдүүдээ дагаад сэтгэхүйгээ өөрчлөх хэрэгтэй юм. Дээр үеийнх шиг таван хошуу малын тухай давтан ярихаас илүү хүүхэд юу үзэж, юу сонсож байгааг мэдэрч харилцах нь чухал. Манай цэцэрлэгийн багш нар яг энэ арга барилаар ажилладаг. Тухайлбал, хүүхдүүдийн үзэх дуртай одой морийг бид цаасаар хийж, сүүл, сагмай хэсгийг нь хиймэл үс, утас зэргээр бүтээсэн юм. Ингээд хүүхдүүдэд хайртай одой мориныхоо сүүл, сагмайг нь нь сүлжиж өгөхийг даалгана. Энэ нь  хүүхдийн хурууны булчинг ажиллуулж, эв дүйтэй болгож, цаашлаад сургуульд ороод үзгээ барих бэлтгэл нь болж байгаа юм” гэв.

Орон нутгийн багш нарын юмханаар юм хийх ухааныг магтахгүй байхын аргагүй. Таван хошуу малтай хот айлаар хөдөөгийн амьдралыг дүрсэлсэн бол лууван, манжин, төмс, байцаа зэрэг хүнсний ногоо гүйцэд ургаж боловсрохоороо ямар хэмжээтэй болдгийг харуулсан макет загвар, ундааны саваар үзэг, бал, харандааны сав хийсэн байсан нь тэдний ажилч хичээнгүй төдийгүй хүүхдүүддээ аливаа юмсын учир шалтгааныг ойлгуулж, сургах гэж хичээдэг зангийн илрэл болох нь тод харагдаж байлаа. Үзэсгэлэн Монголын хүүхдийн ордонд өнөөдөр нээлтээ хийсэн юм.




Манай сайт таньд таалагдаж байвал мөн сайтад нийтлэгдсэн
мэдээ мэдээлэлийг түргэн шуурхай уншихыг хүсвэл "LIKE" дарнауу



Шинэ мэдээ
Тоглолтын мэдээ
  • Д.Отгонжаргал фэнүүдээ Д.Отгонжаргал фэнүүдээ "Хун галуу"-ны эгшиглэнт ертөнцөөр аялуулнаДуучин Д.Отгонжаргал гэхээр Миний ээж тэмээчин, Хайрлахын жаргал, Хун галуу гээд хүн бүрт өөр өөрийн танил, дотно дуунууд санаанд бууна. Ийм сайхан бүтээлүүдийн эзэн, уянгат сайхан хоолойгоороо сонсогчдынхоо зүрх сэтгэлийг нэвт эзэмдэж чаддаг энэ уран бүтээлч маань төр, түмнээсээ "Монгол Улсын Соёлын тэргүүний ажилтан" хэмээх эрхэм алдрыг хүртсэн нь саяхан.
  • С.Жавхлан гавьяатын тоглолт ҮЗЭГЧДИЙН ХҮСЭЛТЭЭР дахин товлогдлооС.Жавхлан гавьяатын тоглолт ҮЗЭГЧДИЙН ХҮСЭЛТЭЭР дахин товлогдлооС.Жавхлангийн дууг мэдэхгүй хүн гэж үгүй. Найман настай балчраас наян настай буурай хүртэл даган дуулж, уяран хайлж байна. Түүний дуунууд одоо ч хуучнаараа, сонсох бүрийд дотнохон. УИХ-ын гишүүн болоод урлагийн алтан тайз, үзэгч, сонсогч фэнүүдээсээ хэсэг хугацаанд хөндийрөөд байсан Гавьяат жүжигчин С.Жавхлан тайзнаа иргэн ирлээ. Тэрээр ард түмэнтэйгээ тайзан дээрээс энэ өдрүүдэд мэндчилж байна.
  • “МОРИН ХУУР- 33” шилдэг дууны концерт болно“МОРИН ХУУР- 33” шилдэг дууны концерт болноМонгол Улсын Соёлын яам, Засгийн газрын хэрэгжүүлэгч агентлаг Соёл, урлагийн газар, Монголын Хөгжмийн Зохиолчдын холбоо, Монгол Улсын Филармони хамтран “БҮХ НИЙТИЙН ХӨГЖМИЙН БАЯР 2020” арга хэмжээг 2020 оны аравдугаар сарын 05-ны өдрөөс арваннэгдүгээр сарын 15-ны өдрийг хүртэлх хугацаанд улсын хэмжээнд зохион байгуулж байна.
  • Ерөнхий сайд гэргийтэйгээ үзсэн Ерөнхий сайд гэргийтэйгээ үзсэн "Анна Каренина"Бямба/2020.10.03/гариг. Цагийн зүү 18.00-ыг зааж байлаа. Улсын драмын эрдмийн театрт үзэгчид цагаасаа өмнө ирцгээжээ. Бүтэн 10 сар хаалга барьсан драмын театр үзэгчдээ, үзэгчид театраа санасан мэт. Ийнхүү Төрийн соёрхолт найруулагч Н.Наранбаатарын найруулгаар Монголын тайзнаа амилж буй алдарт Лев Толстойн “Анна Каренина” үзэгчдийн оюуны цангааг тайлахад бэлэн болжээ. "Анна Каренина" аль эртнээс үзэгчдийн хүлээлт дагуулсан ч коронавирусийн улмаас нээлтээ хойшлуулснаар намартай золгосон.
  • П.И.Чайковскийн мэндэлсний 180 жилийн ойд зориулсан хүндэтгэлийн концерт болноП.И.Чайковскийн мэндэлсний 180 жилийн ойд зориулсан хүндэтгэлийн концерт болноМонгол Улсын Филармонийн Симфони найрал хөгжим Петр Ильич Чайковскийн мэндэлсний /1840-1893/ 180 жилийн ойд зориулсан хүндэтгэлийн концертыг өөрийн тайзнаа 2020.10.10-10.24-ны өдрүүдэд 18:00 цагт Улсын Филармонийн тайзнаа тоглогдох болно.
 Сүүлд нэмэгдсэн дуу